الرئيسية / برجا الآن / مهرجان ليالي برجا ٢٠١٦ ، حكاية نجاح وتَميُّز برجاويّة مئة بالمئة

مهرجان ليالي برجا ٢٠١٦ ، حكاية نجاح وتَميُّز برجاويّة مئة بالمئة

8كتب الدكتور خضر ترو :

ما في شك أن المهرجان ببرجا عنده حيثيّة خاصّة فيه، ولما نقول في مهرجان ببرجا، بتتحرك الهمم وبيتحمّسو الشباب المتطوعين والهدف تحقيق الإنجاز.

الكل ناطر المهرجان وعلى أحرّ من الجمر، وعم يطالب في من بعد نجاح مهرجان ليالي برجا سنة ال ٢٠١٢.
هالسنة فريق العمل كان أكتر من ممتاز، الشباب والصبايا يعطيهن العافية، والشكر للنادي الثقافي يلي أخد على عاتقه إعادة مهرجانات الزمن الجميل يلي كانت تتنظم من جمعية بيت التراث بآخر التسعينات لما كانت برجا أوّل من كرّس مفهوم المهرجانات التراثيّة بالمنطقة.

 

قبل البرنامج الفني نظّمنا بالشراكة مع منظمة مرسي كوربس كرمس للأطفال واستقبلنا من الساعة ٤ للساعة ٦ حوالي ١٥٠٠ طفل وأهاليهن، لعبو وخضعو لإختبارات متعلقة بموضوع حماية الطفل وكان فريق العمل على مستوى عالي كتير من الاحترافية وتم توزيع العديد من الهدايا عالأطفال يلي اشتركو بالألعاب التثقيفية ووصلنا للأهل رسائل توعويّة عن حقوق الطفل.
أما بالنسبة للبرنامج الفني، حاولنا ونجحنا بتقديم مواد عالمسرح أخدت الجمهور لمطرح كتير راقي وحلو، جمهور برجا أروع جمهور ممكن يتمنى الواحد يشوفه.

كلّو سمّيعة والحسّ الفنّي عنده عالي كتير ومش من السهل إرضاؤه.

من هيك كنا دقيقين باختيار الفقرات، واختيار المشاركين بالبرنامج الفني. وعريف الحفل الشاعر محمد حامد حدادة والآنسة المتألقة عميرة عمر الخطيب كانو على قد المسؤوليّة.

بعد اقتصار مشاركتها ببعض المعزوفات الموسيقيّة بمهرجان سنة ال ٢٠١٢، زيّنت الأوركسترا الهارمونيّة الوطنية التابعة لموسيقى قوى الأمن الداخلي بقيادة العقيد زياد مراد مهرجان ليالي برجا ٢٠١٦ وقدّم الأساتذة كارول عون وشادي عيدموني أجمل الأغاني اللبنانية يلي أسرت الجمهور بحلاها وحسن الأداء ، والحمد لله كان الجمهور عند حسن الظنّ بانضباطه وحسن استماعه.

فرقة برجا للفنون الشعبيّة أبدعت عالمسرح متل عادتها والصدفة خلّت الجمهور يشوف أول مشاركة بلوحة عالمسرح لمدربها الدكتور خضر ترو من يوم إطلاقها سنة ال ١٩٩٨.

شعراء برجا كانو عالموعد وبيّنو عن مستوى عالي بالكلمة ورقي بالصور الشعريّة من نمر شبو والزغلول والتحدي الزجلي للشاعر فادي الحاج والشاعر محمد عادل السيد.

هدف مهرجان ليالي برجا كان دائماً إبراز المواهب، قدمنا زغلول برجا عن فئة الزجل، صبا عارف رمضان عن رقص الباليه، ودبيكة بيطلعو لأول مرة عالمسرح ببرجا وشباب غنّو بالكورال.
ركّزنا هالسنة عالكورال بشكل خاص، وكان التعاون مع المايسترو خالد حوحو يلي اشتغل مع تسع شباب من برجا وقدّم بوقت قياسي اربع أغاني من التراث البرجاوي تغنّت بالصوت المباشر عالمسرح.

تذكرنا محمد مرعي وتسرح وتمرح، وعبد الرحمن سعد ورح جن كرامة عينك، خليل حلاق ويا عمي يا بياع الورد وصبحي مراد ويم المريول النيلي.

بالإضافة للمواهب، كرّمنا التايغر فادي الخطيب، الرياضي الكبير، البطل يلي حمَل لبنان بقلبه وعلى كتافه بمحافل كرة السلّة العالمية والإقليميٌة.

كرّمنا الملحن المرهف والراقي، إبن برجا يحي الحسن، الملحن المجهول يلي قاعد بالظل وأغانيه على كل شفة ولسان وكل عرس وكل راديو وتلفزيون وعلى وسائل التواصل الإجتماعي.

كرّمنا الأستاذ والموسيقي طاهر حميّة لمسيرته الأكاديميّة ولعطاءاته بمجال الموسيقى.

كرّمنا عضو الهيئة التنفيذيّة لرابطة الشعراء والملحنين وناشري الموسيقى في لبنان، الشاعر الغنائي علي غصن لتميّزه بالشعر الغنائي.

حصّة برجا كانت الحصّة الكبيرة بليالي برجا ٢٠١٦ ومن الطبيعي يكون المطرب المتألق صبحي توفيق عالموعد، فقدّم وصلة غنائية منوعة بين الأغاني البلديّة والطربية والقدود الحلبيّة.

مهرجان ليالي برجا ٢٠١٦ غيّر صورة المهرجان النمطيّة يلي تعود أهل برجا عليها، طلعنا من الطريق … وبيلبقله مهرجان برجا يكون بمكان بيليق بأهلها وضيوفها. ضيوف إجو من كل المناطق اللبنانية على رأسهن الأستاذ فيليب بسترس ممثل وزير السياحة راعي المهرجان، ومعالي النائب علاء الدين ترو وممثلين عن نواب وفعاليات المنطقة بالإضافة لوفد كبير من التجمع الوطني للثقافة والبيئة والتراث على رأسه المهندس أنطوان أبو جودة والممثل القدير أنطوان كرباج يلي شرّف برجا بحضوره.

هالسنة تنظم المهرجان بأرض خاصّة وهون بشكر الحاج ياسين البراج على استضافته وكرمه، وبشكر كمان كل المساهمين مادياً ومعنوياً وتقنياً وأفراد فريق العمل يلي ساهموا بتنظيم أفضل مهرجان انعمل ببرجا على مر التاريخ ودون مبالغة.

بيلبقلها برجا يكون عندها مكان مخصص للمهرجانات… المشاعات كتار، ومش صعبة ينعمل مدرّج روماني ببرجا للمهرجانات، الضيع التانية مش أحسن منّا… وهالموضوع منحطّو برسم المعنيين…

لما خلص مهرجان ليالي برجا ٢٠١٢، قالولي إنو عليك مسؤوليّة كتير كبيرة، لأن النجاح يلي تحقق بوقتها كان صعب يتكرر برأيهن، ولأنه شافو انه بلشنا من مطرح العالم بتحلم توصلّه.

رغم ضيق الوقت والصعوبات التقنيّة، نظمنا مهرجان ال ٢٠١٦ وهدفنا التميّز والإبهار.

كنا عارفين انه الغلط ممنوع، وانه لازم نحقق نجاح أكبر من نجاح ال ٢٠١٢، وعارفين كمان انه مش المهم تعزم الناس، ومش مهم العدد، المهم تعمل من قيمتها… والمهم تريحها حتى تبقى لآخر المهرجان تحضر وتتذكر وتحكي فيه حتى أيام بعد انتهاؤه…

والحمد لله تصنّف مهرجان ليالي برجا من أفضل المهرجانات يلي تنظّمت هالصيفيّة على مستوى لبنان وبشهادة الجميع من برجا ومن خارج برجا والتوفيق كان من عند الله.

وبعد مهرجان ليالي برجا ٢٠١٦، المسؤوليّة كبرت أكتر علينا وعلى غيرنا … المطلوب المحافظة عالمستوى لأنو صورة برجا بالدَّق …

وكل مهرجان وكل نجاح وتميّز وانتم بخير …

 

عن إدارة الموقع

شاهد أيضاً

برجا تبتهج بزيارة بطريرك أنطاكيا وسائر المشرق بشارة الراعي

كتب الشيخ جمال جميل بشاشة: بينهما ستةٌ وثمانون عاماً، وهي ما تحيد عن لبنانيتها ووطنيتها …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *